Urriaren 9an hurrengo Berbatxangoa egingo dugu, gure eskualdeko portuak, arrantza eta lehengo bizimodua hobeto ezagutzeko. Ikasturte honetan Egizu elkartekoak hasi gara Berbatxangoak antolatzen Sopelako Aitxu elkarteko kideekin batera. Irteera hauetan edozein euskaldunek har dezake parte. Gure helburuak dira Sopela eta Getxoko euskaldunok elkar ezagutzea, berbalagunon arteko zubiak eraikitzea, eta eskualdean dugun ondareaz jabetzea (naturala, historikoa, arkitektonikoa…) beti ere euskararen bidetik.

Hemen duzue gaian sartzeko Josu Larrañagak bidali digun testua, animatu, goizetik eguerdira arte gozatuko dugu elkarrekin!

“Uribe Kostan hiru portu nagusi ditugu: Armintza, Plentzia eta Algortakoa. Portuak, eremu zabal baten atariak dira: itsasotik beste herri batzuetako produktuak etorri zaizkigu. Berrikuntza ugari iritsi dira itsasotik. Arrainak ere portuetan lehorreratzen dira. Portuetatik ere erasoak heldu dira…

Hiru portu, dozenaka bizibide: Armintza arrantzale-herria izan da, Plentzia nabigatzaile edo marinelena, eta Algortan ez da falta izan piloturik.

Berbatxango honetan gure portuen iragana eta oraina ezagutuko ditugu. Garena ulertzeko izan ginena gogoratuko dugu, itsasoa, lan egiteko lekua izatetik aisialdirako gune bihurtu dugun honetan”.

Noiz: urriaren 9an, domekan.
Non: 9:00etan Algortako Kirikiñon eta 9:15ean Sopelan
Autobusa: 3 € – umeek 0 €
Piskolabisa eskainiko dizuegu
Aldez aurretik izena eman behar da
Sopelako Aitxu taldean: aitxuizuba@gmail.com
Getxoko Egizu elkartean: www.egizu.org / 619 935 541