“Zainzuri nafarrak” lehen euskarabazkariaren kronika

Lehen euskarabazkaria Bidebitarten

Lehen euskarabazkaria Bidebitarten

Algortan, 2015eko apirilaren 20an

Joan den asteburuan Bidebitarte txokoan lehen euskarabazkaria izan zen. Egizuko kideok prestatu genuena.

Goizeko hamarretan, sukaldari eta laguntzaileak elkartu ginen bazkaria prestatzeko. Patata eta zainzuriak zuritu eta zatitu genituan, baita piper gorri eta barazkiak ere.

Isabelek gatzatua prestatu zuen ardi esnearekin, ondoren hozten utzi zuen, oso gozoa egon zen, eta marrubiak limoiaz amaitzeko, postre gozoa izan zen.

Sukaldari eta laguntzaileek hamabitako ederra egin genuen, Iñigo Bilbaok grabatuta dauzkan bertsoak entzuten genituen bitartean. Iñigo bertsolari berria eta on-ona da.

Bazkariaren menua hauxe izan zen:
Hasteko, piper berde frijituak, txistor zati bat eta txanpinoiak urdaiazpikoarekin.
Zainzuri naturalak, patata eta ilar gisatuekin.
Untxiak barazkiekin.
Isabelek egin zuen gatzatua eta marrubiak limoiarekin.
Kafea eta izozkiak.
Batzuek pattarrak hartu zituzten.
Prezioa hamabost euro izan zen.

Kantuan euskarabazkarian

Kantuan euskarabazkarian

Iñigo, Sabin, eta Joserrak bazkaria prestatu genuen. Bai bazkaria prestatzen, bai bazkaltzen genuen bitartean eta kafea hartu ondoren euskaraz giro interesgarria izan zen. Gero ez ziren falta izan pasadizoak, txisteak, eta abestiak, Roziok kantutegi polit bat eta janari errezetak eraman zituen eta. Hamabost pertsona elkartu ginen, bai irakasleak, bai euskaldunzaharrak, bai euskaldunberriak eta euskara ikasten ari garenok ere.

Oso egun atsegina, euskaraz praktikatzeko, entzuteko eta gozatzeko primeran izan zen. Berbalagunok, eta euskaldunok elkar ezagutzeko ere interesgarria izan zen.

Jendea elkartzeko, bai euskaldunzaharra eta berriak, eta euskara ikasten ari garenok ere, ondo jateko, abesteko, txisteak eta pasadizoak kontatzeko, baina batez ere, euskaraz hitz egiteko eta gozatzeko, hori da euskara bazkariaren xedea.

Hurrengoan, ea elkartzen garen berbalagun gehiago, eta musikari bat edo bi etortzea interesgarria izango litzateke. Laguntza eta asmo berriak ongi etorriak lirateke, eta denok gonbidatuta zaudete hori lortzeko.

Joserra

Argazkiak: https://www.flickr.com//photos/egizu/sets/72157652089598885/show/

Irakurri, gozatu eta oparitu egitasmoa martxan Getxon

Irakurri, gozatu eta oparitu

Irakurri, gozatu eta oparitu

Bihar, lehenengoz, Irakurri, gozatu eta oparitu egitasmoa martxan jarriko dugu Getxon:

  • Irakurzaletasuna sustatzeaz batera, euskarazko literatura eta herrietako liburutegiak ezagutaraztea dira egitasmoaren helburuak
  • Esperientziaren “bidaiaz gozatzeko” gonbidapena egin dute antolatzaileek aurten
  • Egizu elkartea, Getxoko Udala eta Euskaltzaleen Topagunearen ekimenez jarriko da martxan egitasmoa. Udal liburutegiak, BOLiBAR-ELORDUI, GOBELAURRE eta ELKAR liburu dendak egitasmoaren ezinbesteko kolaboratzaileak dira.
  • Liburuaren Nazioarteko Egunean, apirilak 23, hasi eta ekainaren 30era arte iraungo du. Liburu dendetan, uztailaren 11 arte.
  • Euskal Herri osoko 42 herritan gauzatuko da egitasmoaren bederatzigarren edizioa.
  • Erosketa txekeak eta EGIZU eta Bizarra Lepoan Euskara elkarteko kideentzako abantaila bereziak eskainiko ditu egitasmoak.
Irakurri, gozatu eta oparitu

Irakurri, gozatu eta oparitu

Kanpainaren izenak berak argi adierazten duenez, hiru pausu eman behar dira bertan parte hartzeko:

Irakurri. Lehenengo pausoa irakurtzea da, euskaraz irakurtzea, alegia. Horretarako, herriko liburutegi publikora joan, eta euskarazko edozein liburu maileguan eskatu ahal izango da etxera eraman eta irakurtzeko.

Gozatu. Liburua irakurri, liburutegira itzuli eta fitxa sinple bat bete beharko da: zein izan den irakurritako liburua eta iritzia. Fitxa hori beteta, liburuzainak erosketa-txekea emango du, hitzartutako liburu dendan erabiltzeko.

Oparitu. Azken pausua, liburua oparitzea da: lagun bati, senide bati, edo norbere buruari.

Liburutegian jasotako txartelarekin, parte hartzaileek euskarazko beste edozein libururen prezioaren %25 ordaindu ahalko dute ( Egizuko eta Bizarra Lepoan euskara elkarteko bazkideek %50*).

Maiatza eta ekaina bukaeran, 30 €ko erosketa-txeke bana zozketatuko da, hile horretako parte hartzaileen artean.

Getxoko parte hartzaileek BOLIBAR-ELORDUI, GOBELAURRE eta ELKAR liburu dendetan erabili ahalko dituzte txekeak.

* Egizuko eta Bizarra Lepoaneko bazkideek %50eko deskontua izateko bulegora etorri beharko dira elkarteko zigilua txekean jartzeko* (Martikoena kalea 16, 2.solairua 3-4 bulegoak)

Irakurri, gozatu eta oparitu

Irakurri, gozatu eta oparitu

 

Berbatxangoa: “Kontsumo arduratsua eta agroekologia Uribe Kostan” domeka honetan

Berbatxangoa: Kontsumo arduratsua eta agroekologia Uribe Kostan

Berbatxangoa: Kontsumo arduratsua eta agroekologia Uribe Kostan

Apirilaren 26an hurrengo Berbatxangoa izango dugu eta kontsumo arduratsua eta agroekologiaren gaia jorratuko dugu bertan. Gabi Basañez eta Gotzon Kamiruaga abeltzainek euren esperientziaren berri emango digute, oilo, ahuntz eta txerriekin lan egiten ari dira. Lander Labajoren ortura joango gara gero, bera barazki-ekoizlea da eta kontsumo-talde bat du martxan. Beraiekin kontsumo-taldeez eta salmenta zuzenaren garrantziaz ere berba egingo dugu.

Kontsumo arduratsua eta agroekologia Uribe Kostan

Azkenik sOrtuak proiektuko ortuetara egingo dugu bisita, Getxoko Moreagan. Bertan bi taldek funtzionatzen dute modu autogestionatuan, euskaraz eta ekologikoan produzitzen dutenak.

Gaian interesa baduzu, animatu eta eman izena. Bus txikian egingo dugu buelta osoa, Erandiotik hasita Sopelara.

Busa non eta noiz:
Erandio 9:30 (Gasolinoa)
Algorta 9:45 (Telletxeko markesina)
Sopela 10:00 (Elizako markesina)

Bisita-gidatua (10:30-14:00): eskualdeko baserritar eta ekoizleen esperientziak bisitatu, kontsumo-taldeen gaia jorratu eta sOrtuak ortu ekologiko eta autogestionatuak ezagutuko ditugu

Prezioa: 5€ helduek (busa eta mokadua) umeak doan
Leku mugatuak, eman izena lehenbailehen!

Aldez aurretik izena eman herriko euskara-elkartean: Erandio (berbots@gmail.com / 630 404 170), Sopela (aitxuizuba@gmail.com / 603 894 364), Getxo (egizugetxo@gmail.com / 644 277 155)

Berbatxangoak Erandioko Berbots, Sopelako Aitxu eta Getxoko Egizu elkarteen artean antolatzen ditugu, eskualdeko ondarea, euskara eta euskal kultura sustatzeko.

sOrtuak: ortu ekologikoak euskaraz

sOrtuak: ortu ekologikoak euskaraz

Hemen behean sOrtuak proiektuaren zein kontsumo-taldearen berri duzue, parte hartu nahi izanez gero ateak zabalik daude.

Kontsumo-taldea
Kontsumitzaileok zuzenean erosten dizkiegu baserritarrei euren produktu ekologikoak, bitartekaririk gabe eta baldintza duinetan. Hilean birritan saskiak jasotzen ditugu hainbat produkturekin, 3 hilabeteko proba egin nahi duzu?

sOrtuak
Ortu ekologiko euskaldun eta autogestionatuak Getxon; nekazaritza, elikadura, harremanak eta hizkuntza bizi!
Parte hartu gura baduzu, jarri gurekin harremanetan: 644 277 155 / egizugetxo@gmail.com

Hurrengo berbatxangoa maiatzaren 17an izango da, “Itsasadarretik industria-bidaia” egingo dugu Euskal Herria itsasontzian.

“Erorikoak, ahuntzak eta tunelak” apirileko bizikleta-irteeraren kronika

Bizikleteroak zubian

Bizikleteroak zubian

2015eko apirilak 18

Astean zehar somatu da ardiek larrera joan nahi dutela, hasiera batean eguraldiaren iragarpena ez zen oso ona baina inork ez zuen zalantzan jartzen irteera egin egingo zela, martxoan txangoa ezin izan zenez egin, oraingo honetan bai ala bai.

Gari hain dago gogotsu ezen 09:17an Portugaleten dago zain, nahiz eta geratzeko ordua 09:30ak izan. Artzainak esan zuen orduan heltzeko eta nahiko ondo portatu dira ardiak, ustekabean Deriotik etorritako bat tartean. Beno, beti dago ardi beltz bat “mesedez itxaron pixkat, beste aldean nago!” esaten duena (uletzekoa da, Superflyren zain egon da azken momentura arte baina …). “Eta Gorka? Agian bidegorrian egongo da gure zain!”

Beno ba hasierako argazkia atera eta bagoaz, eguraldiak eguerdira arte errespetatuko omen gaituenez, arrapaladan aldapan gora giharrak berotzeko. Bidegorrira heldu gara, eta Gorka? Ba ez dago, aurrera orduan. Bidean ohiko “aspaldiko!”, “zelan oporrak?”, “zelako bizikleta, berria da?” eta gero, lehengo aldapa malkartsuak erraz gainditu ditugu. Aldapa gora ondo baina behera? Plasta! Lehen erorikoa! Negar malko batzuk ixuri eta minik ez duela dio, urratuak besterik ez, gizajoa azkarregi kendu ditu atzeko gurpiltxoak.

Hamaiketakoaren ordua hurbiltzen ari da baina ez da hain erraza izango, artzainak bide posible bi eman dizkigu aukeratzeko, ahobatez bietan gogorrena izan da irabazle . Gutxi batzuek lortu dute bizikleta gainean igotzea goraino, besteok mihia kanpoan eta oinak lurrean. Iturrian ur pixkat edan ondoren merezitako mokaduaren bila goaz. Kafesne, tortila eta ogi opil artean “buf”aren erabilera posibleak erakutsi dizkigute adituek: pasamontaña, pirata, txapela, burka…

Tropela tunelean

Tropela tunelean

Trumoi batzuk sumatu, euri tantak hasi eta tenperatura pixkat jaitsi denez pedalei eragitea pentsatu dugu. Paisaia biziki politak dauzkagu begi bistan: zulatutako mendi gorriak, animalia desberdinak landa berde artean eta artalde xelebre bat bizikleta gainean artzain-gidari-argazkilari batek gidatuta. Baina hiru edo lau tunel pasa eta gero artaldea beldurtu egin da ilunpetan eta urez beteta zegon azken tunelak itxura oso txarra zeukalako. Taldeko ausartena soilik abiatu da zulo beltzaren barrura. Besteok bide alternatibo bat hartu dugu ezkerretara, errazagoa zelakoan, baina … Artzainaren begiradapean, banan bana bide eztu, malkartsu, busti, harritsu, eta perretxikoz betetako batean behera abiatu gara eta bapatean: plasta! Eguneko bigarren erorikoa, argazkilari bat dago han goian baina ez du ezer harrapatu. Luzaketa batzuk egin, perretxiko “pozoitsuak” alde batera utzi, minik ez dagoela zihurtatu eta etxerantz euria dator eta.

Aldapan gora

Aldapan gora

Hurrengo irteera eguna?, ardi ausarta tunelean oraindik?, Superfly non dago?, … erantzunak laster email, watsap… bidez. Adi beraz!

Eskerrik asko Aritz kronikagileari eta David argazkilariari!!!

Apirilak 25 Alluitz-Astxiki

mendi irteera ONA

Kaixo mendizale hori!!!

Apirilaren 25ean Egizutarrok beste mendi irteera bat antolatu dugu Alluitz-Astxikira. Oraingoan ere, Ungari eta Txorimaloko lagunekin joango gara.

Hitzordua hurrengo larunbatean, Fadurako parkinean goizeko 9:00etan jarrita dago. Irteera goizean zehar izango da eta bazkal-ordurako etxean izango gara.

Animatzen zaretenak egizugetxo@gmail.com helbidera mezu bat bidali eta zehaztu kotxea eraman al duzuen ala ez.

Animo eta ez ahaztu hamaiketakoa!!!

Ostegunera arte eman izena Euskarabazkarian!

Arroz esnea

Arroz esnea

Larunbat honetan izango da euskaltzaleon arteko lehen otordua, apirilaren 18an elkartuko gara Bidebitarte txokoan bazkaltzeko. Etortzeko gogoz bazabiltza, animatu, bihar arte baitago epea izena emateko, ostiralean eta larunbat goizean erosketak egin behar ditugulako.

Hauxe da aukeratu dugun menua:
Piketako: piper berde frijituak, txistorra eta txanpinoiak urdaiazpikoarekin.
Lehena: esparrago naturalak patata eta ilarrekin gisatuak.
Bigarrena: untxia barazkiekin.
Postrea: gatzatua eta marrubiak limoiarekin.
Kafea eta izozkia.

Txisteak edo pasadizoak kontatu nahi badituzu, prestatu itzazu, bazkalostea girotzeko. Geuk kantutegiak eramango ditugu.

Euskarabazkaria: apirilaren 18an, larunbata, 14:30ean, Bidebitarte txokoan (Sarrikobaso 3, Algorta)

14:15ean Baserri tabernan elkartuko gara elkarrekin bertara joateko

Izena emateko 10€ko sarrera egin behar duzu, Joserrari edo Roziori eskura eman edo Laboral Kutxako Egizuren zenbakian sarrera egin (BAZKARIA+izen-abizenak ipinita). Azken hau egiten baduzu, abisatu mesedez 644 277 155 edota egizugetxo@gmail.com helbidera.

Kontu korronte zenbakia: ES20 3035 0067 66 0670062588 (Laboral Kutxa)

Eskerrik asko bileretan eta antolakuntza-taldean zabiltzatenoi, animo, ekipo eta larunbatera arte!

Euskarafariak! Zer dira Euskarafariak (edo kasu honetan Euskarabazkaria)? Nortzuk dabiltza honetatik tiraka? Gastronomia, euskara eta giro atseginean ibiltzea gustatzen bazaizu, gonbidatuta zaude. Hemen duzu azalpen luzexeagoa nortzuk garen eta zein den gure helburua.

Xedea: Euskaldunok elkar ezagutzeko eta elkartzeko, euskaldun zaharrak zein berriak izan, euskaraz berba egiteko, jateko, abesteko, gozatzeko.
Ideiak eta proposamenak: Proieku hau denon artean egingo dugu, ideiak eta peoposamenak botatzeko epea zabalik dago.
Non: txoko batean edo jantoki batean. Txokoetan merkeago eta erosoago. Jantokietan euskara bizirik dagoela erakusteko, herrian ikusgarritasuna izateko.
Noiz: Hilean behin edo bi hilean behin, edo…
Nortzuk: euskaldunak eta euskara ikasten ari garenak, baldintza bakarra euskaraz aritzeko gogoa.
Prezioa: 12€ – 15€ artean, trago luzea aparte. Aldez aurretik eta izena emateko 10€ emango dira, otorduaren ostean kontuak atera eta gero falta den diru zatia ordainduko da bertan.
Nola: Talde txiki batek menua aukeratu, erosketak egin eta prestatuko luke; kantutegiak eraman, txisteak eta pasadizoak kontatzeko prestatu. Jantoki batean bada, prezioa kontratatu, lekua, denbora, kantutegiena goian bezala.
Zenbat: 10 eta 30 lagun artean.

ArgIHIzkiak lehiaketa zabalik maiatzaren 15era arte

argIHIzkiak: 2015eko kartela

argIHIzkiak: 2015eko kartela

IV. ArgIHIzkiak lehiaketa
Argazkietan oinarritutako testu laburren lehiaketara lanak aurkezteko epea gaurtik aurrera zabalik maiatzaren 15era arte

NBEk Argiaren eta hori oinarri duten Teknologien nazioarteko urtea izendatu du 2015a; han eta hemen hamaika ekimen eta ekitaldi antolatuko dira horren harira. Horixe, beste aitzakia bat baino ez, aurten ere ArgIHIzkiak lehiaketa antolatzeko. Izan ere, beren-beregi, bat egiten du-eta argazkietan oinarritutako testu laburren lehiaketa honen arimagaz: ‘Fotografia’ edo ‘argazki’ berbek “argiarekin marraztea edo idaztea” dute jatorrizko esangura. Horrenbestez, zuen begiradek argien eta hizkien hizkuntzekin jolastea proposatzen dizuegu. Hala, irudien eta hizkien hizkuntzetan oinarrituta, ArgIHIZkiak lehiaketa antolatu dugu, beste behin, Uribe Kostan: ArgIHIzkiak testu laburren euskarazko literatura-lehiaketa.

Egizu Getxo Euskaldun elkarteak eta HIRUKA komunikazio-taldeak, Uribe Kostako hainbat udal (Leioa, Berango, Getxo; eta Makomunitatea) eta zenbait elkarterekin (Berbots, Bizarra Lepoan, Aitxu!, Leioako berbalagunak) elkarlanean, ArgIHIzkiak literatur lehiaketa antolatu dugu aurten ere. Argazkietan oinarritutako IV. testu laburren lehiaketa honetara lanak bidaltzeko epea daborduko zabalik dago, eta azken eguna maiatzaren 15a izango da.

Literatur ekimenaren helburu orokorrak hurrengoak dira: jendea euskaraz idaztera eta irakurtzera animatzea, eta Uribe Kostako argazkilariak eta euren lana sustatzea eta zabaltzea. Horretarako dagoeneko 10 argazkilariren argazki bana aukeratu ditugu eta horietan oinarritutako testuak idatzi beharko dituzte parte hartzaileek.

Laugarren ekitaldi honetarako euren argazkiak helarazi dizkiguten Uribe Kostako (edo bizi diren) argazkilari profesional edo zaletuak dira: David Herranz, Marisol Ramirez, Luis Jauregialtzo, Ines Bermejo, Sonia Aoujil, Nerea Falagan, Marta Iraurgi, Ivan Viña, Patricia Merino eta Itsaso Bartolome.

Argazkiak (eta oinarriak) hemen ikus daitezke: www.argihizkiak.com

OINARRIAK
*Lehiaketan 16 urtetik gorako edonork parte hartu ahal izango du.
*Euskara batuan ala edozein euskalkitan idatz daitezkeen testuetako bakoitzak argazkietako batean
oinarrituta egon beharko du eta egileak adierazi beharko du zein argazki aukeratu duen
*Kategoria BI ditu:
-Bata, labur-laburra (160 karaktere gehienez)
-Bestea, laburra (100 hitz gehienez).
*Testu mota guztiak, hau da, prosa, olerkia, bertsoa, haikua e.a. onartuko dira.
*Parte-hartzaile bakoitzak, gehienez ere, bi testu bidali ahal izango ditu (bi kategoria berean edo testu bana bi kategoriatan; bi testuak argazki berari jarriak izan daitezke).
Parte-hartzaileek testua(k) (sms, whatsapp edo posta elektronikoz) hurrengo helbideetako batera bidali beharko d(it)u(z)te:
685 73 29 63 / argi.hizkiak@gmail.com

Uribe Kostako epaile bik osatutako epaimahaiak epaia irailaren 14an emango du ezagutzera.

SARIAK
Kategoria bakoitzeko irabazle bana izango da eta 200€ jasoko ditu. Horiez gainera, argazki bakoitzeko
testu irabazle bat aukeratuko da eta beraientzako saria lanak datorren irailetik aurrera eskualdeko
hainbat lekutan antolatuko den erakusketa ibiltarian ikusgai egotea izango da. Jasotako testu guztiak
webgunean agertuko dira.
Info+: www.argihizkiak.com / argi.hizkiak@gmail.com / 685 73 29 63

Haziei buruzko ikastaroa apirilaren 18an

Haziei buruzko ikastaroa

Haziei buruzko ikastaroa

Ortu ekologikoetan gabiltzanontzako eta gaiarekin ineresa duen edonorentzako proposamena dakargu oraingoan, haziei buruzko ikastaroa. Datorren larunbatean izango da, apirilaren 18an, 9:00etatik 14:00etara Algortako Aldai Patronatuan teorian eta Moreagako sOrtuetan praktika.

Ikastaroaren plangintza hau izango da:
2´30 ordu: Teoria ( Nola hasi, erabili behar ditugun haziak, nola eta noiz egiten den hazi-uzta, nola gorde, identifikazioa eta etiketajea, hazi-bankua, genetika, hazitegi teknika, azpi beroak, hazitegi normalak, ureztaketa)
2,30 ordu: Praktika ( Hazitegi eta azpi beroak egiten, lur gainean landaketa, birlandaketa).

Apirilak 18, 5 orduko saioa 12€ (langabetuak 0€)
Areitz soroa taldeko lagunen eskutik
Izena emateko: 644 277 155 egizugetxo@gmail.com

Areitz soroa taldeko lagunen eskutik antolatu dugu ikastaroa. Nekazaritza ekologikoa lantzen dugu sOrtuak proiektuan, eta urtero formazio saioren bat egiten ahalegintzen gara. Ikastaroan edonork eman dezake izena, norbaitek diru-arazorik badu 12€ko matrikula pagatzeko jarri gurekin harremanetan. Izena emateko: 644 277 155 / egizugetxo@gmail.com, leku mugatuak dira.

Apirilaren 26an hurrengo Berbatxangoa izango dugu eta gaiarekin lotura izango du, Uribe Kostako hainbat adibide bisitatuko ditugu kontsumo arduratsua eta agroekologia sustatzen dituztenak, animatu eta ez galdu aukera. Hemen behean sOrtuak proiektuaren zein kontsumo-taldearen berri duzue, parte hartu nahi izanez gero ateak zabalik daude.

Kontsumo-taldea
Kontsumitzaileok zuzenean erosten dizkiegu baserritarrei euren produktu ekologikoak, bitartekaririk gabe eta baldintza duinetan. Hilean birritan saskiak jasotzen ditugu hainbat produkturekin, 3 hilabeteko proba egin nahi duzu?

sOrtuak
Ortu ekologiko euskaldun eta autogestionatuak Getxon; nekazaritza, elikadura, harremanak eta hizkuntza bizi!
Parte hartu gura baduzu, jarri gurekin harremanetan: 644 277 155 / egizugetxo@gmail.com

Bizikleta-irteera: Meatze-bideetan barna apirilaren 18an

Hiru neskak Luzeron

Hiru neskak Luzeron

Martxoan egin barik lotu zen ibilbidea proposatzera gatoz oraingoan, Meatze-bideetan barna animatuko gara apirilaren 18an; eguraldia dela eta azken uneko erabakiak jakiteko bizikleteroen posta-zerrendan edota whatsapp taldean (644 277 155era idatzita) izena eman dezakezu.

Bizikleta-irteeraren ostean euskarabazkarira joango gara, plan hori ere zabalik dago, animatuz gero, bota mezua!

Eguna: apirilaren 18a, larunbata
Lekua eta ordua:
Fadurako Parkinean: 9:00
Bizkaia Zubian Portun: 9:30
Bidegorria, Portun: 9:45
Kilometro-kopurua: 41km (Trena bidean: Renfe, Bilboraino)
Zailtasuna: erraza. Etapa laburra baina aldizka gora beherekin
Oharra: hotzarako arropa eta ordezko piezak eroan. Etapa eta perfila aztertu.
Harremanetarako telefonoak: 652 73 54 45 / 685 732 963
Ibilbidea: http://ibilbideak.euskadi.net/ibilbideak/view.do?id=33993

zikloturismoa

Euskarabazkaria antolatzeko gogoz?

Sukaldariak lanean

Sukaldariak lanean

Apirilaren 13an, astelehena, 20:00etan, Aldai Patronatuan elkartuko gara lehen Euskarabazkaria antolatzeko. Gogoz bazabiltza animatu! Saltsa berri hau prestatzeko lagun eta ideia bila gabiltza. Konfirmatu email bidez (egizugetxo@gmail.com) edota whatsapp bidez (644 277 155).

Menua aukeratu, erosketen ardurak banatu eta eguna prestatu, horiexek izango dira bileraren nondik norakoak, ezin baduzu honetan parte hartu 18rako izena eman dezakezu lasai asko.

Euskarabazkaria: apirilaren 18an, larunbata, 14:30ean, Bidebitarte txokoan (Sarrikobaso 2, Algorta)

Euskarafariak! Zer dira Euskarafariak (edo kasu honetan Euskarabazkaria)? Nortzuk dabiltza honetatik tiraka? Gastronomia, euskara eta giro atseginean ibiltzea gustatzen bazaizu, gonbidatuta zaude. Hemen duzu azalpen luzexeagoa nortzuk garen eta zein den gure helburua.

Xedea: Euskaldunok elkar ezagutzeko eta elkartzeko, euskaldun zaharrak zein berriak izan, euskaraz berba egiteko, jateko, abesteko, gozatzeko.
Ideiak eta proposamenak: Proieku hau denon artean egingo dugu, ideiak eta peoposamenak botatzeko epea zabalik dago (otsailaren 26an gure lehen bilera izan genuen Aldai Patronatuan). Hemen behean duzue bilera horretako informazioa: non, zer eta noiz egin nahiko genituzkeen gauzak.
Non: txoko batean edo jantoki batean. Txokoetan merkeago eta erosoago. Jantokietan euskara bizirik dagoela erakusteko, herrian ikusgarritasuna izateko.
Noiz: Hilean behin edo bi hilean behin, edo…
Nortzuk: euskaldunak eta euskara ikasten ari garenak, baldintza bakarra euskaraz aritzeko gogoa.
Prezioa: 12€ – 15€ artean, trago luzea aparte. Aldez aurretik eta izena emateko 10€ emango dira, otorduaren ostean kontuak atera eta gero falta den diru zatia ordainduko da bertan.
Nola: Talde txiki batek menua aukeratu, erosketak egin eta prestatuko luke; kantutegiak eraman, txisteak eta pasadizoak kontatzeko prestatu. Jantoki batean bada, prezioa kontratatu, lekua, denbora, kantutegiena goian bezala.
Zenbat: 10 eta 30 lagun artean.

Egizu elkartea

egizugetxo@gmail.com
Martikoena 16, 2-3, 48992 Getxo (Alango)
IFZ: G95360095

Telefonoak

619 935 541 Asier

685 732 963 Lander

644 277 155 Rozio